Ermediate Man Sekelewet

Sada pendilo man banta si ngukitken Tuhan Jesus jadi guru ras Juruslamatta, e me ngusih si ibahanNa nandangi sekelewetNa. La IA pernah latih emperdiateken si lemah, si sakit ras si lit perbebenna si mberat. Jesus hadir lako ngkurangi dingen ngangkatken perbeben sekelewetna. Ngusih perbahanen Jesus e, Moria pe i bas  pogramna tetap mperdieteken teman ras perpulungen si sakit, dingen si mberat perbebenna. Rikutken anggaren si itetapken isehken me penampat ras toto gelah si sakit e ndaatken serpang pulah.

I bas tanggal 4 maret lit 6 kalak perpulungen si idahi moria pusat bidang Diakonia, ku klasis Binjai Langkat. Si enem e erbage situasi pinakitna; lit si sakit menahun dingen enggo metua, lit dua kalak pandita GBKP  si man sampaten erkiteken pinakit si mekelek. Labo erndobahen, ise pe labo dalih. Si ngaloken penampat e eme anak-anak si ikelengi Tuhan. Moria dalanNa nehken pasu-pasuNa.

Bage me Moria alu semangat dingen dem kelenga ate encidahken ras ngelaken kekelengen Tuhan. Kai si ibahan BPP Moria e, jadi min usihen man kerina moria GBKP. Radu ras kita ngusih Tuhan Jesus i bas emperdiateken sekelewetna.