Moria GBKP secara organisasi ibentuk ibas tanggal 16 Oktober 1957. Amin keikut sertan ras peran Diberu itengah masyarakat ras gereja enggo ibenaken ndauh sope sie. Lit piga-piga kegiaten si jadi bena-bena (cikal bakal) Moria sope tanggal 16 Oktober 1957. Christeijke Meisjes Club Maju (CMCM) eme Perkumpulan Maju Perempuan Kristen, latarbelakangna enda ilitken erkiteken masyarakat Karo paksa langa mereken kesempaten dingen ngidah seri kerna anak dilaki ras diberu ibas jabu ras kegeluhen sosial ras budaya. Emaka guna mperlengkapi anak diberu secara organisasi bagepe rohani ibentuk me CMCM enda ibas tanggal 10 Agustus 1933, paksa e lit 24 kalak diberu menaken perjumpan e. Programna paksa e me kegiaten rohani: rende, ertoto, koor bagepe pengetahuan umum ngoge, nulis, kesehaten ras kebersihen bagepe ketrampilen ibas nikapken pangan(tataboga) ras njait. Organisasi enda ipelopori Nr. Pdt. Van Den Berg, Ny. Dr. De Klein, Surter Meyer, Pertumpun Purba ras Nimai br Purba.
Tahun ku tahun CMCM enda reh maju ras erkembangna itengah-tengah diberu masyarakat Karo, emaka guna ngembangkenca tole, tambah me piga-piga club eme: club man anak-anak, remaja, pemudi ras pernanden. Emaka mulai me ilitken dingen itambahi guru guna ngajar kerina klub enda, janah guruna ibas anggota CMCM enda nari (diberu Karo). Sedekah pendidiken ibas CMCM enda reh teremna me anggotana si tek dingen ngaloken Kristus jadi Juruselamatna.
Perkembangen maka enggo melala ibentuk kelompok-kelompok PA, ngidah sienda me maka kedungenna iusulken me ku sidang Sinode gelah ilitken sada organisasi diberu ibas gereja, ibas sidang Sinode tahun 1956 i Tigabinanga. Amin la menukah mutuskenca tapi kedungenna sidang mereken rekomendasiken man Gr. Ag. Rahel br Sinuraya guna nikapken perjumpan ras anggaren dasar kerna persadan diberu ibas GBKP.
Emaka nerusken keputusen Sinode enda, ilakoken me perjumpan ibas tanggal 16 Oktober 1957 i Kantor Moderamen GBKP, lit 54 kalak diberu si pulung paksa sie. Ibas perjumpan enda iputusken me gelar persadan diberu ibas GBKP eme MORIA, gelar deleng ija Abraham mpersembahken anakna man Dibata (Kejadin 22:2). Paksa e struktur organisasi eme Dewan Pengurus Pusat (DPP), dekahna kepengurusen periode enda eme 1957-1960. Kenca e ibas tanggal 16 Oktober 1960 me maka ibahan kongres Moria GBKP si pemena sekaligus pemilihen pengurus gua periode 1960-1963.
Bageme seterusna alu ngikuti perkembangen gereja ras masyarakat, Moria hadir ibas erbage program si lit guna ikut ‘menghadirken’ kerajan Dibata alu nggeluh sue ras sura-sura Dibata. Secara organisasi la sitik tantangen siman alanken ras perubahen-perubahen si jadi ibas masyarakat, mbentuk ras mabai Moria GBKP jadi pasu-pasu ibas kerina kecibal kegeluhen. Seh kubas periode 2015-2020 sigenduari enda, enggo ilakoken 13 kali MUPEL (kongres) si ije la saja nehken lapuren pendahin tep-tep periodena tapi pe ngukuri kebutuhen diberu ras gereja ibas jamanna rikut pe perjumpan ‘pesta iman’ kerina pengurus Moria ibelang-belang GBKP ibas kerina wilayah pelayanen (runggun, klasis ras pusat).