Nggeluh Jadi Pasu-Pasu

Sosialisasi Buku PA Moria GBKP enggo erdalan alu mehuli. Benaken i bas  bulan Januari seh Pebruari 2024. Moria Klasis semangat i bas ndahiken dahin enda amin erbage pengalamen si inanamina. Mpepulung pengurus moria runggun ras pengurus moria sektor labo kepe mesunah. Sendah ibereken momo arah WA group, dua wari nari maka balasna, deba ogena saja la lit komentar, deba la iogena pe. Kenca itelpon sada persada je maka benakenna ngerunggui si berkat. Kesabaren Moria klasis ngalo ngalosa e pe enggo jadi pasu-pasu.

Si 27 klasis enggo kerina erbahan soialisasi. Tema si ipeseh man kerina moria rikutken tema buku PA moria 2024 e me Nggeluh Jadi Pasu-Pasu rikutken tema sasaren pelayanen GBKP tahun 2024, berkarya ras berguna bagi orang lain. I bas sosialisasi e iajuk kerina pengurus moria gelah ngelumbaken geluh jadi pasu-pasu man sekelewetna. Jadi pasu-pasu e banci arah pengajaren ras perbahanen si teridah ras ernanam.

Iarapken kerina pengurus Moria mabai PA setiap mingguna alu make metode-metode si enggo isikapken i bas buku PA. Gelah tiap PA lit variasina, la monoton, janah murah ngantusi kata Dibata alu metode si erbage-bage. Alu ndalanken metode e pe moria enggo encidahken karya nyata, lit aksi si ilakoken, la terjeng ibelasken. Arah karya-karya si lit banci nambahi kengasupen jadi pasu-pasu ku sekelewet.

Bujur man Moria Klasis si enggo ertenah man Pt, Dk si diberu bagepe Pandita si diberu ikut ku bas sosialisasi enda. Em tandana kita  sada tim ras serayana Tuhan i bas ndahiken dahin pelayanen Moria khususna. Bujur man kerina serayan Tuhan si enggo muat bagin, reh teremna kita ikut sosialisasi enda reh ersadana pengankanta kerana isi buku PA ras sasarenna. Reh majuna kiniteken Moria GBKP dingen reh ngasupna jadi pasu-pasu ku sekelewetna. (Pdt. Nurbety br Ginting)